Thursday, May 13, 2010

Legenda dan jenis-jenis hantu dari Jakarta (Betawie)





Wuanjrittt, baru kali ini ane bikin blog sambil merinding disko, yang bikin merindingnye bukan cerrtanye, tapi gambarnye., googling masa nyari gambar setan banyak banget, udah gitu upload lagi gambar setannye, buset dah.
kali ini ane mau bagi-bagi cerite tentang hantu-hantu yang ade di sekitaran betawie..langsung aje deh yee..huehuehuhe..

Mungkin jika ente semua pernah pade tinggal di perkampungan Betawie, yang ade dimana aje..mungkin pernah denger cerita-cerita serem dari bibir Engkong (Kakek), Babe(Bapa)..ato juga dari saudara-saudara ente yah mungkin buat zaman sekarang ni..udah banyak yang ga ada ceritain ni lagi.


Kuntilanak Genderuwo'

kuntilanak
Kalu menurut cerita orang dulu, Kuntilanak itu adalah sebutan buat orang perempuan yang mati beranak atawe abis beranak dan belon ampe 40 hari masa nifasnye kemudian diye mati penasaran. Kadang diye nongol emang menyerupain perempuan yang baru meninggal karena ngelahirin atawe keguguran eni. Demennye tinggal di puhun kembang (seperti pohon kamboja, pohon cempaka, pohon kenanga).

Dengan ciri2 suara yang khas seperti ringkikan kuda dan dengan penampilan yang biasanye berupa perempuan berambut panjang dengan baju putih yang panjang (orang Betawi bilang baju longdress!!), atawe bija juga muncul dengan bentuk seperti perempuan yang masih berupa pocong..

Munculnye Kuntilanak eni biasanye bersamaan kalu ada perempuan yang lagi mau beranak, perempuan lagi ngalamin keguguran dan banyak ngeluarin darah. Kalu kate dukun beranan orang yang lagi begini darahnye wangi.. auk dah wangi menurut siape ? perasaan kalu kite cium mah amis..
Cerita orang dulu malah lebih serem lagi.. katenye kalau bini kite lagi pengen beranak mangkenye si suami kudu nemenin, karena kagak jarang ade Kuntilanak nyang suka nyaru jadi dukun beranak. Nanti kalu pas tuh anak keluar diye baru berubah jadi ujud nyang sebenernye.. dan siap memangsa.. akhirnye si anak ame si emak jadi mati mendadak..

Seremnye lagi, nantinye si emak bakal jadi Kuntilanak dan sianak bakal jadi Gederowok. Bener atawe enggaknye nih cerita tapi emang begini cerita nyang beredar di sekeliling masyarakat Betawi dari mulai Rawa Belong ampe Setiabudi, dari mulain Mampang ampe Pasar Minggu, dari Mulai Senen ampe Ancol.
ape iye yeee ????

Setan Rep-Rep

ditindih setan

Nah, kalu setan rep-rep itu, menurut kepercayaan orang Betawi dulu itu adalah penjelmaan Jin yang berupa gonggo (Laba-laba) yang kakinye ade tujuh. Biasenye setan rep-rep eni sering menggode orang yang lagi tidur. Kite dalem mimpi kadang seperti orang nyang diayun tinggi2 dan dijatuhin dari atas ke bawah ampe kite berase tereak sekenceng kencengnye. Kalu orang Betawi bilang ampe ati rasenye ilang.. gitu..
Kadang juga kita berasa badan kite ade nyang nindiin.. berat banget.. kite mau bangun susah.. kadang juga kita berasa udah bangun dan kite tauk kalu kita udah melek dan di sekeliling kite ade orang .. tapi begitu kite tereak.. atupun kagak ade nyang denger.. nanti pas tuh setan ude puas ngerjain kite atawe pas kite inget dengan sedikit baca-bacaan semisal baca ayat kursi, sahadat, atawe baca Qulhu.. baru deh kite dilepas dan bisa bangun dengan keringet nyang udeh ampe kayak jagung.. dan basah di badan.

Setan Kuburan
hantu kuburan

Setan kuburan itu biasenye nongol emang sengaja lagi mo ngegodain orang nyang lagi pade jalan kendirian di tempat nyang sepi dan di malem nyang emang cocok buat diye nongol. Pada waktu diye mau nongol biasenye agak larut dan dingin dengan situasi nyang sepiii banget. Tapi, biasenye kite dibuat kagak sadar situasinye jadi kite rada2 kagak nyadar kite ketemu ame diye soale diye biasenye berupa orang, bisa lelaki bisa perempuan. Nanti, kalu kite udah keenakan diajak jalan baru deh pas kite sadar kite udeh kesasar ke dalam wilayah pekuburan. Anehnye.. kadang keberadaan kita nyang kesasar juga jadi sesuatu yang nggak mungkin. Misalnye, kite bawak motor trus ade nyang numpang eh pas di wilayah situ diye terbang ke pohon kembang.. atawe ke pohon sawo atawe kemboja. Pas kite sadar tau-taunye kendaraan kite udah ade di tengah-tengah kuburan.
Pernah kejadian ade seseorang pemuda nyang kenalan ame seorang perempuan di tempat tontonan. Setelah abis kenalan, kebiasaan seorang lelaki buat nawarin jasa buat nganterin pulang. Nah, kejadian ini sering banget dialamin. Sesampainye di rumah tu perempuan diye dikasih minum dan akhirnye nginep dan tidur di dipan kayu yang biasenye dibikin dari bambu. eh.. jebulnye besok paginye diye bangun udeh ade ditengah2 kuburan.

Kalong Wewe'
kalong wewe

Setan semodel kalong wewek ini biasenye nongol pas menjelang menggerib atawe abis banget menggerib. konon kabarnye setan sejenis eni paling demen ngumpetin anak-anak nyang pas waktu menggerib masing keluyuran diluar rumah. Cerite engkong ane nyang perne diumpetin ame setan kalong wewek ini (kalau dicerita2 sering orang sebut wewe gombel) berjenis kelamin perempuan dengan tetek yang melorot ampe ke puser, bebulu dari pundak ampe pantat. paling lebet sekitar kemaluannye ampe nutupin. tingginye paling2 dua ampe tiga keli tinggi orang dewasa.
Setan kalong wewe ini. kalu ngumpetin tuh anak nyang lagi diincer biasanye nggak jauh-jauh kok. cuman kadang kitenye aje nyang kagak pade bisa ngeliat. Nah, kalu udah ada kejadian ade anak nyang ilang karena diumpetin ame kalong wewe.. biasenye orang sekampung pade keluar rume sambil bunyi-bunyiin alat-alat rume tangge macem mukulin kaleng krupukle, mukulin tampah, bakul, piring kaleng atawe gelas muk. bisa juga cuntang (semacem rantang).
Nah, nanti kalu tuh setena udeh bosen biasanye tuh anak dilepas.. baru deh ketemu atawe keliatan ame orang2 nyang lagi pade nyariin. Anak kecil nyang biasanye abis diumpetin ame setan kalong wewek jadi sedikit linglung.. mangkenye kudu buru-buru disemburin ame aer yang abis dibacain ame ustad atawe dikasih minum aer yang abis dizikirin ame guru ngaji. insya-alloh lepas entu langsung diye dah bisa nangis.

Tuyul
bukan tuyul

Menurut cerita masyarakat betawi Tuyul itu sejenis jin yang bisa dipake sama orang-orang yang pengen mencari kekayaan dengan jalan yang nggak halal. Biasanye dengan sesajen atau syarat2 tertentu nanti diye nugasin tuyul tersebut buat nyari duit dengan cara gaib, dimana orang yang kehilangan duit nggak nyadar kalu duitnya udah ilang digondol tuyul.
Ade nyang bilang kalu tuyul itu makanannya darah sajen, ada juga yang syaratnye tuh tuyul ditete-in ame bininye.

 









Babi Ngepet ; Ngiprit Monyet cara kepingin kaya

babi ngepet
Ada lagi cara mau cepet kayak yang sering dilakonin ame orang2 musyrik, yaitu jadi babi ngepet atau bisa juga dengan cara ngiprit monyet. Cuman, kalu pake tuyul itu biasanye kite minta jasa mahluk gaib. Nah kalu Babi ngepet atawe ngiprit monyet biasanye nyang ngelakonin buat nyari duitnye ye orang itu kendiri. Dengan bacaan2 tertentu nanti pada malam2 tertentu diye akan berubah menjadi seekor babi buat nyari duit dengan cara ngegesek2in badannye ke tembok rumah orang yang mau diambil duitnye.
Bisa juga kalu melaluin ngiprit monyet.. diye cukup gegarukan badannye atawe lompat-lompat di depan orang yang pengin diambil duitnya. Kate orang dulu, tande2nye orang yang suka ngiprit monyet biasanye suka pade belang badannye. Tauk dah bener ape kagak..

Jelangkung

"Jelangkung jelang-se disini ada pesta besar
Dateng kagak dijemput pulang kagak dianter"
jelangkung
Kate2 yang kayak beginian dulu dijaman ane masing kecil sering dipake kalau lagi pas malem bulan purnama. Tujuannye sik cuman buat maen-maenan berupa anak-anakan yang dibuat dari gayung yang dikasi tangan silang dengan ujungnya dikasi pensil atawe alat tulis laen yang bisa digerakin. boneka jelangkungnya dikasi baju dan kaen. dengan sajen pake kembang 7 rupa nanti ade acara manggil makhluk halus yang diminta masuk ke dalam jelangkung. Setelah ada tanda2 setang tersebut masuk ke dalam boneka jelangkung, maka akan diadain wawancara atawe pertanyaan dari orang yang pade ikutan maen.. nanti dijawab ame tulisan yang dilakukan oleh tangan jelangkung yang udah diiketin alat tulis. Dan bila si jelangkung ingin menulis maka tangan dari orang yang memegangnya akan lemes dan bikin coretan-coretan sendiri.
Pas acara dianggap udah selesai dan si jelangkung merasa udah cape maka dengan kalimat terakhir barulah boneka jelangkung akan seperti semula lagi.

Memedi
memedi

Setan memedi ini biasanya hanya nongol pada malam bulan purnama atau pas malem rada terang bulan. Biasanye memedi ini kalau menggoda orang ia seperti seekor binatang yang menyelinap disekitar kita dengan suara berisik seperti tikus atau kucing yang sedang main disampah jadi ada bunyi kresek-kreseknya.
Bila kita sempet nemuin suara seperti ini maka kalu kita gesuh (hus!!) segera binatang tersebut berubah menjadi lebih besar dan seterusnya hingga kita merasa ketakutan dan melarikan diri.


Setan Balon
setan balon

Setan balon ini biasanye diye bebunyi mendesis. Setan ini berupa makhluk jin dengan kuping yang panjang hingga ampe bahu. Nah, siape2 yang pada saat itu kena tamparan kuping dari setan ini, maka diye akan merasakan mukanya menjadi tebal. dan nggak lama kemudian menjadi agak menyon.











Setan Cacar atau Setan Brontol
hantu-wanita

Penyakit cacar pada jaman dulu menjadi berita yang nyeremin. di awalin dengan tersiar berita adanye seorang ibu2 yang menyebarkan beras kuning di sekeliling kampung. dan bila sengaja ditunggu diye akan ngilang.
Beberape saat kemudian baru deh wabah penyakit cacar akan dirasain sama warga termpat dibuangnya beras kuning ini. Pada saat Ibu ame Bapak ane anaknye masing pade kecil-kecil orang tua perempuan ane perne ngalamin kena penyakit cacar, yang pade masa entu emang memakan korban yang lumayan banyak banget. Matinye juga emang rada nyeremin. Menurut orang yang pernah ngalamin kendiri. tuh setan sepertinye dateng ke rumah yang di dalem nye ade orang yang sakit pade tiap jem 9 malem, jem 3 pagi, jem 11 siang, dan jem 3 sore. model nyang datengnya kira-kira lebih dari empat orang cebol yang dateng sambil menggotong "kurung batang". (Keranda Orang Mati)



TAMBAHAN:


Si Manis Jembatan Ancol


legenda si manis jembatan ancol

Mitos ini sudah dimulai puluhan tahun sebelumnya. Di tahun 60-an ketika daerah Ancol masih berupa empang-empang (tambak), seorang pendayung perahu pernah bertemu dengan Si Manis. Perempuan itu naik perahu malam-malam dan membayar pendayung tersebut dengan daun. Keterangan ini didapat dari Kostan Simatupan, seorang fotografer keliling di Ancol.
Sebenarnya siapakah Si Manis Jembatan Ancol tersebut?
Berdasarkan tradisi lisan yang berkembang di masyarakat sekitar, Si Manis tersebut bernama Mariyam (ada juga yang mengatakan gadis itu bernama Siti Ariah), yaitu seorang gadis manis kembang desa yang meninggal di kawasan jembatan Ancol dan jasadnya dibuang setelah sebelumnya diperkosa.
Karena kematian yang tidak wajar, akhirnya Mariyam menjadi ‘penunggu’ jembatan Ancol yang beberapa kali menampakkan diri pada orang-orang tertentu.Artikel ini ane dapet dari inbox di pesbuk, yang ngirim bang Jay-anak Kemayoran

7 comments:

  1. haha.. Namanya lucu lucu tapi wajahnya serem.. Tapi si manis jembatan ancol sama kolor ijo gak ada? Hehe..

    Thx ya udah share.. Aku makin tau nih..

    ReplyDelete
  2. ko ga ada pocongnya gan.....:D
    http://fukyu.co.cc

    ReplyDelete
  3. iy tuch.. gw gi nyari2 ilustrasi si manis jembatan ancol..

    ReplyDelete
  4. GADO-GADO: hahaha, kolor ijonya lagi dicuci :D
    tapi yang si manis udah saya tambahkan diatas..
    fukyu : dia kan hantu nasional gan :)
    Febby: sekarang sudah ada :)

    ngga nyangka sudah tiga hari ini artikel saya tentang hantu betawi ada di 10 list Hot di lintasberita :)

    ReplyDelete
  5. Setan-setan betawi ini lebih menakutkan ketimbang setan setan bule....!
    oh ya sob bedanye setan betawi ame setan bule ape yahh sob.????

    ReplyDelete
  6. Mantapp sobb masuk di lintas berita yahh,,..

    ReplyDelete
  7. setan rep-rep itu paling mantep. Ane pernah ngalamin tuh direp-rep.... antara sadar ama kagak sadar... tapi enak juga loh direp-rep dari pade ketemu kuntilanak..... mantap bang.. tulisan ini sebagai apresiasi kita sama dunia hantu.

    ReplyDelete

Related Posts Plugin for WordPress, Blogger...
Artikel Acak